პროდიუსერი, სცენარის ავტორი
ბესარიონ გიორგობიანი
ბესარიონ გიორგობიანი დაიბადა 1954 წელის 18 მარტს, საქართველოში, ქალაქ ქუთაისში. მან 1978 წელს დაამთავრა თბილისის სახელმწიფო სამედიცინო ინსტიტუტი და შემდგომში, 10 წლის განმავლობაში მუშაობდა ექიმ თერაპევტად. სტუდენტობის და სამედიცინო მოღვაწეობის დროს ის საფუძვლიანად შეისწავლიდა იმ მეცნიერებებს, რომლებიც ეხებოდა როგორც ადამიანის ფიზიკურ სხეულს (ანატომია, ბიოქიმია, ფიზიოლოგია, მიკრობიოლოგია და სხვა) ასევე იმ მეცნიერულ, ფილოსოფიურ და რელიგიურ საფუძვლებს, რომელთა მეშვეობით ადამიანის მენტალური არსება საზრდოობს (ფილოსოფია, ფსიქოლოგია, პატოფსიქოლოგია, ფსიქიატრია, ფსიქოანალიზი, სხვადასხვა რელიგიური და მისტიკური სწავლებები)
სამედიცინო ინსტიტუტში სწავლის დროს ის დაინტერესდა ხელოვნებით, დაიწყო მოთხრობების, ლექსების წერა, ქანდაკებების შექმნა და შეისწავლა კლასიკურ გიტარაზე დაკვრა. 1985 წელს ის ხელოვნების დარგით სწავლას განაგრძობს შოთა რესთაველის სახელობის თეატრალურ ინსტიტუტში, კინოსარეჟისორო ფაკულტეტზე. 1989 წელს მისი სადიპლომო და სადებიუტო მოკლემეტრაჟიანი ფილმები: „,მთვარეული“ და „შემთხვევით ნანახი სახე“ ახალგაზრდობის, კიევის საერთაშორისო ფესტივალზე „საუკეთესო რეჟისორის“ პრიზს მოიპოვებს.
ამ წარმატების შემდეგ, ბესარიონ გიორგობიანი სამუშაოდ მიწვეული იქნა ოდესის კინოსტუდიაში, ორ სერიანი მხატვრული ფილმი „წამიერების“ გადასაღებად. ფილმის გადაღებები მიმდინარეობდა სამხრეთ კავკასიის ქვეყნებში, (ჩეჩნეთი, ინგუშეთი, დაღესტანი). შემდეგ ის მიიწვიეს მოსკოვში სამუშაოდ, სადაც გადაიღო მოკლემეტრაჟიანი მხატვრული ფილმი „ორეული“. ფილმი 1991 წელს მონაწილეობდა კანის საერთაშორისო ფესტივალზე, მოკლემეტრაჟიანი ფილმების კონკურსში.
საქართველოში დაბრუნების შემდეგ ის იღებს: სრულმეტრაჟიან დოკუმენტურ ფილმს „კატასტროფა“-ს, სრულმეტრაჟიან მხატვრულ ფილმს „დურუ“-ს, მხატვრულ ტელესერიალს „27 დრაკონი“-ს, თოჯინურ ანიმაციურ ტელე შოუს „დიდების ზღაპარი“-ს, თეატრის და კინოს სახელმწიფო ინსტიტუტში ხელმძღვანელობს სარეჟისორო ჯგუფს, წერს ათზე მეტ სრულმეტრაჟიანი ფილმის სცენარს, მათ შორის სამი სცენარი: „სისხლიანი პოემა“, „მივლინება კავკასიაში“ და „ლილიტი“ შექნმა ამერიკელ თანაავტორებთან ერთობლივად (კეტრინ კორტეზი, ჯონ ელისი და ანა ბიანი). როგორც პროდიუსერი უცხოელ პარტნიორებთან ერთობლივად მუშაობს დოკუმენტურ და მხატვრულ ფილმებზე: „ეს დღე რომ არ ყოფილიყო“ (აშშ), „პრემიერა“ (შვედეთი) „მიშა მოსკოვის წინააღმდეგ“ (აშშ) და G4 (აშშ).
ამ ეტაპზე, ამერიკელ პროდიუსერთან და სცენარისტთან ანნა ბიანთან ერთობლივად მუშაობს სრულმეტრაჟიანი მხატვრული ანიმაციური ფილმის „არგონავტების“ პროექტზე. პროექტის განვითარების საწყისი ეტაპი, მცირე გრანტით, დააფინანსა საქართველოს კულტურის, სპორტის და ახალგაზრდობის სამინისტრომ.
